AMIAMOKOREN BALENTRIA

                Gorapenean,

                Oren onean

                Sorturikako

                Amiamoko:

                Dena zangar

                Luze, mehar,

                Dena lepho

                Eta moko...

        Hots, Amiamoko jauna,

        Xitan utzirik laguna,

        Ur bazterrez bazabilan

        Bere bi makhilekilan.

                Urak eder eta garbi,

                Harea zolan ageri.

        Arrainak goizik alhari,

        Har, ulitx edo xixari,

        Nun ez duketen janhari.

        Oi, ni banintz arraintzari!

                Hegi hegian,

                Hor, agerian,

                Xipak lorian;

                Ur mehez mehe,

                Garbi den hare

                Xarboek bere;

                Osina goiti

                Kabozak jeiki;

                Tropan ibilki...

Bainan brist! Zerk egin du brist:

Zilhar izpi, zilhar ximist?

        Amarrain bat izipera

        Harroka zilo batera

                Joan da ihesi,

                Baitu ikusi

                Amiamoko

                Zela hurbilsko.

        Zangar luz geldirik zagon

        Eta bere baithan zion:

                Zer balio dik

                Hari klask, hau klik,

                Asean ase,

                Goserik gabe

                Jaten has hadin?

                Gosetu arte,

                Pausa duk hobe;

                Dugun lo egin.

        Moko hura hegalpean,

        Lokhartu zen han berean.

        Oi, ametsaren ederra!

        Arrainez bazen leherra:

                Bai aingira,

                Bira, bira;

                Txipa, xarbo,

                Lerro, lerro;

                Izokinxo,

                Goxo, goxo;

                Bai kaboza,

                Goza, goza;

                Bai amarrain,

                Oi, zer dohain!

        Ametsaren ederraren

                Ederrez,

        Papoaren, hustu arren,

                Beharrez,

        Airatu zitzaion loa.

        Kanporaturik mokoa,

        Lepho luz, kaxko laburra

        Hasten zauku: purra, purra...

                Helmenean,

                Mahainean,

                Ez lutsorik,

                Ez lolorik...

        Urak eder, urak argi,

        Ur berak arrainez garbi;

        Nehundik bat ez ageri...

        Ametsetarik bazkari!

        Zoalarik ohantzerat,

        Xitan zen emea ganat,

        Mokoluzek —Hau badinat!—

        Beretu zuen... bare bat!