AXULAR IDAZLEARI

Axular, Axular,

Eskualdun idazle

Ausart, zorrotz, hazkar

        Suharra...

Geure hots emaile

—Dena su, dena khar—

Irakasle bakar,

        Bakarra...

Zinuen —Axular—

Ergel, erho, nagi,

Gazte ala zahar,

        Alferra

Ernarazi nahi:

Etzadien lokhar

Ez gero'ari jar,

        Ez lerra...

Zinion —Axular—

Hertsi, labur, arrotz,

Eskuara bazen txar

        Meharra,

Zela, zuelakotz

Eskualdunen indar:

Buru, bihotz, bulhar

        Beharra.

Eta gu, nagiak,

Ikasteko lana,

Biltzeko bihiak,

Gathozi zugana...

Xinaurria zare

—Ez nagi, ez bare—

Bihiaren jabe,

Neguak jo gabe.

Eskualdun erlea,

Diozun elhea

Guretzat ez dea,

Garaiko bidea?

«Eztiz eztitzeko,

Ezkoz argitzeko»

Eskuara gurea,

Eskuara maitea?

Eskerrak Axular!

Bihi, bazka, indar,

Egun eta bihar,

Badakigu nun har;

        Zu baithan...

Lagunak ez lokhar:

Aditurik elkar,

Dugun Eskuara sar

Eder, jori, hazkar,

        Orotan!!