www.armiarma.eus
idazleak eta idazlanak Herri literatura TESTUAK Corpus arakatzailea Klasikoen Gordailuari buruz



Argiz argi
Xabier Iratzeder
1947 -1957

      [liburua osorik RTF formatuan]
      [Literaturaren Zubitegia]

 

Iturria: Biziaren olerkia, Iratzeder. Gero, 1983

 

 

aurrekoa hurrengoa

OMIASAINDU

 

                        Furfura furfuri furfurian

                        Dantzan dabil, dantzan doa,

                        Zirimolan, Hegoa...

                        Furfura furfuri furfurian.

 

        Aipa egun, euskal-lurra, hire saindu ixilak

        Etxe kaxko apal hoitan saindutuak eta hilak.

        Heien hatsa, hats beroa, burrunbaka zabilak:

        Bozkarioz bozkaria, jo eta jo ezkilak.

 

                        Furfura furfuri furfurian

                        Dantzan dabil, dantzan doa,

                        Zirimolan, Hegoa...

                        Furfura furfuri furfurian.

 

        Euskal-etxe dohatsuak, kanta zeru aldera.

        Heiek hortxet zabilaten oraikoen lan bera:

        Arrats oroz jiten ziren behiteian deiztera,

        Guk bezala egin dute sukaldean baxera...

 

                        Furfurifa furfurifi furfurifarian

                        Haitz-osto, errauts eta lanoak

                        Oro doatza Hegoak...

                        Furfurifa furfurifi furfurifarian.

 

        Zerukoak, gure deia zuen ganat doala,

        Gure baita zuek utzi min eta lan ixila.

        Min-galernen furfurian, haitz-ostoak bezala,

        Zuen hatsak denak oro zerurat bil gaitzala.

       

        Furfuri-fara furfuri-firi furfuri-firi-farian

        Mendigainetan, haitzpe artetan iratze buru xoroak

        Dantz-errabian, furfurifian baderabiltza Hegoak...

        Furfuri-fara furfuri-firi furfuri-firi-farian.

 

        Omiasainduz gauerakoan gogotik nago mendian,

        Euskal-arima handik sumatzen euskal-lurren furfurian:

        «Izan dezagun denek sineste gure baitan den grazian,

        Barnean jada ereina zaikun betiereko Lorian.»

 

21-10-48

 

aurrekoa hurrengoa