SEASKATXO BAT!

Jaiki gizonak, jaiki artzaiak,

Jauna omen dator eskale;

egin dezagun Aur Jaungoikoa

animen guztien jabe.

Ara emen aur bat

jaio berria,

Jaungoiko izanik

lurrez jantzia...

Begira nago

Aur pozgarria,

nola daukazun

zer miraria!,

esna biotza,

lotan begia.

Lotan zaude Zu

lasto gañean,

esna ta deyez

atai gurean,

intzez beterik

gau illunean,

arrenez eske,

dei samurrean,

ar zaitzagula

guk, biotzean.

Ai, nere Jesus,

atoz nigana!

Zorioneko

Zu zaukazana!

Zuretzako det

nik biotz dana,

ta naiz Zuk eman

samiñ ta lana,

Zaude nerekiñ,

Jesus lastana!

Gizon lurtarrak,

esna ta jaiki,

jaiki ta zabal

biotza ireki.

Jauna da eskale!

Zein ezta erruki?

Egiñ animan,

epel ta garbi,

seaskatxo bat

Jesus Aurrari!

                        Euskal Erria 39 (1898) 597;

                        Euskalzale 2 (1898) 403-404;

                        Euskalerriaren Alde 1 (1911) 355-356;

                        Euskal-Esnalea 1 (1911, 12.zk.) 170-171;

                        Boga-Boga (1964, maiatza-ekaina) [19];

                        Ondarrak, 149-150; Aranzazu (1965) 353a;

                        Ondarroa (1989) 105.