www.armiarma.eus
idazleak eta idazlanak Herri literatura TESTUAK Corpus arakatzailea Klasikoen Gordailuari buruz



Olerkiak
Nikolas Ormaetxea, «Orixe»
1950-1954

      [liburua osorik RTF formatuan]
      [inprimitzeko bertsioa PDFn]
      [Literaturaren Zubitegia]

 

Iturria: Orixe. Idazlan guztiak II: Sorkuntzazkoak, Nikolas Ormaetxea Orixe (Paulo Iztuetaren edizioa). Etor, 1991

 

aurrekoa hurrengoa

EGAN

 

Bildur ikararik ez-baiña, larrua

bilduxe bezala kolkope xulora

sartu naiz ontzira. Lurreti jalkiaz,

—zeru gaiña goibel— asi gera gora.

 

Dabidez naiz oroi: «Jaunaren egalen

itzalean nago, poza daridala».

Ontan, arnas zabal, barrendik irtena,

kolko ximur au bein lasatzen didala.

 

«Uso banintza»rik ez iñork agotan.

Ixil, begi-kuku, burua makurrik,

arkume salgai antz or-emenka daude

zenbait jaun andere, goi-miñak arturik.

 

Aur bat: arat onat, lurrean bailegon,

jostetan; arekin dut ene jarduna.

Or beste bat: ama lo-nai utzia du.

Nini polit onek ba dizu laguna.

 

Osasun galdurik ez dute; barnean

ez kezkarik ere gaitz egiñarenik.

Aieri begira nagola, ba noa,

noizpenka lurrera begiak saietsik.

 

Odeia gaindituz ozkarbian gera.

Eguzkik ez emen lurrean dun garra.

Oiñetan daukagun odei axal onek

zer iduri digu? —Belar sail igarra.

 

Ezker dut gazte bat, ustez aski mardul,

ago-xabalka da, eziñik egurats.

Bero zakarrean alaxe txoria.

Aurrek eta nik, zer lasai dugun arnas!

 

Ameriketan bai oian zabal, itsu!

Zertako da Larraun? An, muskillez muskil,

egun bat bidean lurrik uki gabe

millaka tximuen saldoketa dabil.

 

Ibai, mendi gotor, itsaso t'aintzira

ikusi ta gero, jeixten asi gera.

Aize-magalean ontzia zanbulu...

ta ni... kolko-lasai aurrekin lurrera.

 

aurrekoa hurrengoa