LAÑO GORRIXKA

Laño gorrixka baten

nai zinduzket atxi,

ta izarrik gorenean

ezkuta, Azentzi;

an neretzat bakarrik

zindezadan pitxi,

ene jostaillu zeran

biotzeko antsi.

Zure biotz lapurren

bildurrikan gabe,

kate gozoz lotuak

alkarren mirabe,

biotzak eztaietan

maitezko bi labe,

antxe argitan biok

gindezke poz jabe.

Zeruko Jauna bedi

gure poz ikusle;

ez beza iñork zeleta

gure maite-zale,

ez iñoren bekaitzak

jan gure logale.

Ixil-ixillik biok...

Amesti!... Maitale!...