www.armiarma.eus
idazleak eta idazlanak Herri literatura TESTUAK Corpus arakatzailea Klasikoen Gordailuari buruz



Ethorkia eta Ilkhitzea
Pierre Urte
c. 1700; 1894

      [liburua osorik RTF formatuan]
      [Literaturaren Zubitegia]

 

Bertsio elektroniko honen egilea: Josu Landa Ijurko.

Iturria: The earliest translation of the Old Testament into the basque language (a fragment), Pierre d'Urte (Llewelyn Thomas-en edizioa). Oxford, at the Clarendon Press, 1894.

 

 

aurrekoa hurrengoa

BERROGOI ETA BORTZGARREN KAPITULUA

 

Iosepek bere burua ezagutzera
ematen diote bere anaiei,

3 eta kontsolatzen ditu erakustera
ematen diotela Iainkoaren probidentzia.

10 Gero Faraonen manuz ematen diotzate orgak

ekhartzeko bere aita bere mañadarekien,

22 eta egiten diotzate hetarik batbederari,

eta egortzen diotza bere aitari ere.

25 Iakob aditurikan Iosep bizi zela oraño

prestatzen da Ejiptura goateko.

 

        1. Orduan Iosepek eziñ iduki ahal izatu zuen gehiago bere burua present ziren guzien aitziñean, eta egin zuen oihu, ilkhiaraz zazue batbedera ene gibelera. Eta nihor ere etzen egotu harekien, bere burua eman zioten orduan ezagutzera bere anaiei.

        2. Eta nigarrez zegoela, altxatu zuen bere boza, eta ejiptuarrek aditu izan zuten, eta Faraonen etxeak ere aditu zuen.

        3. Eta Iosepek erran zioten bere anaiei, ni nauk Iosep: bizi da oraño ene aita? Bañan bere anaiek eziñ ihardetsi ahal ziozoketen ezen nahasiak ziren haren presentziaz.

        4. Berriz Iosepek erran zioten bere anaiei, othoizten zaituztet hurbil zaitezte enegana. Eta hurbildu izan ziren. Gero erran zuen, ni nauk Iosep zuen anaia, zuek saldu izan duzuena eramana izateko Ejiptura.

        5. Eta orai eztu zuela ez pena ez urrikirik zuen baithan zeren saldu nauzuen ekharria izateko hunat, ezen Iainkoak egorri niauk zuen aitziñean begiratzekotzat zuen bizia.

        6. Ezen horra iadan bigarren gosete urthea Lurrean, eta oraño goititzen dituk bortz urthe, zeñetan ezpaita izango laborantzarik ez biltzerik.

        7. Bañan Iainkoak egorri niauk zuen aitziñean zuek egonarazteko goititurik lurrean, eta zuek biziarazteko ekzelenki libraturik.

        8. Orai beraz ez nauzue zuek egorri ni hunat, bañan bai Iainkoak, zeñak ordenatu bainiauk aitatzat Faraonendako, eta iauntzat haren etxe guziaren gañean, eta erregiñatzailletzat Ejiptuko herri guzian.

        9. Khexa zaitezte, eta igan zaitezte ene aitagana, eta erran diozozue, horrela erran dik hire seme Iosepek, Iainkoak ordenatu niauk iaun Ejiptu guziaren gañean: Iauts bada enegana, ez adillala geldi.

        10. Eta egongo aiz Goszengo herrian, eta izango aiz ene aldean, hi eta hire haurrak, eta hire haurren haurrak, eta hire arthaldeak, eta hire idiak, eta hire diren gauza guziak.

        11. Eta entretenituko aut han: ezen baituk bortz gosete urthe: gal ez adintzat pobreziaz, hi eta hire etxea, eta hire diren gauza guztiak.

        12. Eta horra zuen begi dakusatenak, eta ene anaia Benjamiñen begiak, ene ahoa mintzo zaitzuela zuei.

        13. Erran diozozue beraz ene aitari nik Ejiptuan dudan loria guzia, eta ikhusi ditutzuen gauza guziak: eta khexa zaitezte, et iautseragin zazue hunat ene aita.

        14. Orduan aurthiki zuen bere burua bere anaia Benjamiñen lephoaren gañera, eta nigar egin zuen. Orobat Benjamiñek nigar egin zuen haren lephoaren gañean.

        15. Gero musu eman zioten bere anaia guziei, eta nigar egin zuen hekien gañean. Horren ondoan haren anaiak mintzatu ziren harekiñ.

        16. Eta habarrotsa aditua izantzen Faraonen etxean, erraten zutela, Iosepen anaiak ethorri dire. Zer agradatu baitzitzaien Faraoni eta haren muthillei.

        17. Faraonek bada erran zioen Iosepi, errotek hire anaiei, egizue hau, kargatzatzue zuen abreak, eta zohazte, bihur zaitezte Kanaango herrira,

        18. eta hartzatzue zuen aita eta zuen famillak, eta bihur zaitezte enegana, eta emanen darotzuet Ejiptuko herriko hoberenetik: eta ianen duzue herriko gizena.

        19. Eta errezibitu duk manatzeko botherea. Egizue hau, hartzatzue Ejiptuko herritik orgak zuen mañadarentzat eta zuen emazteentzat eta ekhartzazue zuen aita eta ethor zaitezte.

        20. Eztezazuela utz deusere zuen mañadatikan: ezen Ejiptuko herri guziko hoberena zuena izango da.

        21. Eta Israeleko haurrek horrela egiñ izan zuten eta Iosepek eman ziotzaten orgak Faraonen manuaren arabera: eman izan zioten probisionea ere bidekotzat.

        22. Eta eman ziotzaten hek guzietarik batbederari aldatzeko arropak, eta Benjamiñi eman ziotzan hirur ehun zillhar pheza eta bortz aldatzeko arropa.

        23. Egorri ziotzan orobat bere aitari hamar asto ekhartzen zituztenak Ejiptuko gauzarik ekzelentenak eta hamar asto eme ekhar ziotenak ogi-bihi, ogi eta bianda haren aitari bidekotzat.

        24. Bidaldu zituen bada bere anaiak, zeñak partitu baitziren, eta erran zioten, eztezazuela iharduk bidean.

        25. Hala igan izan ziren Ejiptutik, eta ethorri ziren Iakob bere aitagana Kanaango herrira.

        26. Eta ekharri zioten berria, ziotsatela, Iosep bizi duk oraño, eta iaun ere duk Ejiptuko herri guziaren gañean eta bihotzak eskas egiñ zioen: ezen etzituen siñhesten.

        27. Eta erran ziotzaten Iosepek erran ziotzaten hitz guziak. Gero ikhusi zituen Iosepek haren ekhartzeko egorri zituen orgak. Eta izpiritua bihurtu zitzaion Iakob hekien aitari.

        28. Israelek bada erran zuen, aski duk, Iosep ene semea bizi duk oraño, goanen nauk, eta ikhusiko diat hil nadin baño lehen.

 

aurrekoa hurrengoa