www.armiarma.eus
idazleak eta idazlanak Herri literatura TESTUAK Corpus arakatzailea Klasikoen Gordailuari buruz



Bertso jarri guztiak
Txirrita
1886-1936, 1971

      [liburua osorik RTF formatuan]
      [inprimitzeko bertsioa PDFn]
      [Literaturaren Zubitegia]

 

Bertsio elektroniko honen jatorria: Txirrita. Jose Manuel Lujanbio Retegi, Txirrita (Antonio Zavalaren edizioa). Auspoa, 1992

 

aurrekoa hurrengoa

Bertso berriak
Txirritak jarriak

 

              1

Denbora, leku, zeru ta lurrak,

izar da illargi, eguzkiyak,

kristaba, aizia, animaliyak,

ur gezak eta gaziyak,

Aita Eternuak sei egunian

egin zituan guziyak;

merezi du ta eman zaizkagun

eskerrak eta graziyak.

 

              2

Aita Eternuak Adan ta Eba

egin zituan aurrena,

lendabiziko gizasemia,

emakumia urrena;

baratza frutaz bete-betian

sartu zituan barrena,

bañan etzuten ondo kunplitu

eman ziyoten ordena.

 

              3

Demonioak ziyon Ebari:

«Fruta artatik jan zazu,

Aita Eternuak dakien ainbat

orduan jakingo dezu;

Berak ori nai eztubelako

zuri debekatu dizu,

orra esan nik egiya eta

orain naizuna egizu».

 

              4

Allegatu zan Adan ta Ebari

fruta ortatik jatia,

etzan posible mundu ontatik

iñor zerura juatia;

oiek kunplitu eztubelako

Jaunaren borondatia,

itxi ziguten guziyentzako

zabalik zegon atia.

 

              5

Adan da Ebaren Kain da Abel

igualak izan eztia,

inbiriyaren gorrotu gaiztoz

il zuen batek bestia,

arrazoiaren biderik gabe

anaia zarrak gaztia;

alakuari kostako zaio

zeruba irabaztia.

 

              6

Lau milla urtian egondu ziran

zeruko atiak itxita,

zenbait anima triste bazegon

linbo beltzera jetxita,

betiko ala biarko zala

beren artian etsita;

zori onian egin zioten

Salbadoriak bisita.

 

              7

Al dan maizena erreza zagun

«Nere Jesukristo Jauna»,

jakiñik dala Jaungoiko eta

gizon egiazko ona,

gurutze pisu baten azpiyan

ain gogoz iltzera juana,

guri atiak zabaldu eta

orain zeruan dagona.

 

              8

Kristau guziyak sinista zagun

Eskriturak dakarrena;

zeru ta lurren agintariya

Jesukristo da aurrena;

eskubiriak arrek emanda

Aita Santua urrena,

Vaticano'ko artzai umilla,

Pio amaikagarrena.

 

              9

Kristoren bidez Apostoluak

zabaldu zuten klerua,

aien autikan ateria da

lendabiziko Kredua,

mandamentu ta artikuluak

dotrinan dauden modua;

oiek sinisten eztituenik

ezta sartuko zerua.

 

              10

Aita Santua Erroma'n dago,

oso gizon seriyua,

abisatzen du gañian dala

guziyentzat eriyua;

gaiztuenari barkatutzeko

badu erremeriyua,

orrengatikan deitzen diyogu

Kristoren Bikariyua.

 

              11

Amaika bider letu izan det

lengo dotriña zarretik:

gezurra esanda ez gera libre

pekatuaren zorretik;

bi bidetara partitu biegu

Jesukristoren aurretik,

ezkerretatik juaten danak

pagatuko du larrutik.

 

              12

Kondenatuben azken fiñeko

penagarrizko pausuak,

bi itz bakarrak esango dizka

gure Jaun amorosuak:

«Orain ez dago barkaziyorik,

kunplitu dira plazuak,

zere pagua emango dizu

serbitu dezun maisuak».

 

aurrekoa hurrengoa