www.armiarma.eus
idazleak eta idazlanak Herri literatura TESTUAK Corpus arakatzailea Klasikoen Gordailuari buruz



Uhaineri nausi
Xabier Iratzeder
1958 -1971

      [liburua osorik RTF formatuan]
      [Literaturaren Zubitegia]

 

Iturria: Biziaren olerkia, Iratzeder. Gero, 1983

 

 

aurrekoa hurrengoa

                        Kristo baitan bat,

                        lur-bidetan bi.

 

 

EZ BERDIN...

 

        Ez gaitutzu, Jauna, jitez egin

                        biak berdin:

        Guk bat izan nahi elgarrekin

                        eta ezin...

 

Euskal-itsasoz naiz ni, erdal-lurrez hura:

Eman dauku bieri Jaunak amets bera.

Gau-egun bagabiltza biak bat Beloken:

Ez-berdinaren mina ezin halere ken.

 

        Ez gaitutzu, Jauna, jitez egin

                        biak berdin:

        Gauza beraz harek maiz atsegin

                        eta nik min.

 

Karitate-argitan galdetu daut neri

Zergatik ote nintzen egun hautan eri.

Nahi gabe jauzi zait: «Zu gatik dut hori.»

Ene hitzak bieri eman dauku zauri.

 

        Guk bat izan nahi elgarrekin

                        eta ezin...

        Ezin hori, Jauna, egin dadin,

                        zuhauk egin.

 

                      * * *

 

Ez dautzut galdegiten min hori kentzea,

Hori baita, nik uste, nere kurutzea.

Bainan zuk emadazu, Kristo Jaun maitea,

Min guzien mineri nausi den Bakea.

 

                      * * *

 

        Bihotza nihork nihorekin

                        ez du berdin.

        Hortakotz dute denek berdin

                        gizonek min.

 

Euskal-semeri ere ez daukuzu, Jauna,

Bakotxari emana jitea berdina.

Bihotza beren asmuz hurbil hurbilena

Daukatenetan da maiz handienik mina.

 

        Bihotza nihork nihorekin

                        ez du berdin.

        Bat egiteko ezin jakin

                        nolaz egin...

 

Baten izanak berak du bertzea mintzen:

Halere, nahiz, fedez, zoin beti bat gauden!

Elgarren elorriek elgar zarraztatzen:

Halere, nahiz, fedez, zoin beti bat gauden!

 

        Bat egiteko ezin jakin

                        nolaz egin...

        Zerurat gaiten elgarrekin

                        joan minez min!

 

                      * * *

 

Elgargo bizitzea betidanik zaio

Nihauren bihotzari zinez bozkario,

Elgarren minen minak ekartzen baitio,

Herrien baterazle, gaitzeko balio.

 

                      * * *

 

Gizonak bihotzean badu beti zauri,

Ez balin bada ere niholaz ageri.

Aintzan piztu ondoan, Jainko-Gizonari

Gelditzen omen zaio zauri zabal hori.

 

On izan baita Kristo, izan denentzat on,

Erran ditakelakotz: hor zauri nun gizon.

On egin bakotxari, horrek eman dezon

Zeru-bide dorpean piska bat zorion.

 

Nik ere, jakin gabe, bihotza dut eri,

Nahiz goiz-arratsetan naizen kantuz ari.

Bertzer emaiten dutan on eta on hori

Zaioke sendagailu nere bihotzari.

 

                      * * *

 

Egin gaitutzu, Jauna, guziak ez-berdin:

Zure bihotz nasaia gutan ager dadin;

Eta, bat ezinean dena min eta min,

Kristoren bidez dugun Zu baitan bat egin.

 

30-11-70

 

aurrekoa hurrengoa