www.armiarma.eus
idazleak eta idazlanak Herri literatura TESTUAK Corpus arakatzailea Klasikoen Gordailuari buruz



Uhaineri nausi
Xabier Iratzeder
1958 -1971

      [liburua osorik RTF formatuan]
      [Literaturaren Zubitegia]

 

Iturria: Biziaren olerkia, Iratzeder. Gero, 1983

 

 

aurrekoa hurrengoa

ELIZA BERRIAREN...

 

Eliza berriaren zeru-bazterrean

Ilargi bai izarrak bazauden dirdiran...

Eta ni, harat beha, otoizle nindoan,

Barnez barne bihotza zeruzta zakitan.

 

Nere ustez bakarrik ibilki bainintzen,

Gau-itzal bat eta bi sumatu nituen.

Bat jarririk bat xutik, bi fraide biziaren

Ni bezala zaudenak zerua miresten.

 

Gau-itzal bat eta bi sumatu nituen:

Bat jarririk, bat xutik, bi zerule ziren.

 

                        * * *

 

Pertsuak balin b... adu zerbeixka balio,

Fraiden ixiltzeari guzia zor dio:

Otoitz, bake ez bada eta zeru-giro,

Bihotzari pertsurik jauzten ez baitzaio.

 

Zeruari begira dauden gau-itzalak

Bihar goizeko fraide langile ixilak.

Heien behar handia du mundu zabalak,

Fedeaz ukan ditzan gizonak hegalak.

 

Pertsuak balin badu zerbeixka balio,

Fraiden ixiltzeari guzia zor dio.

 

                        * * *

 

Zeruz nahi daukute lur guzia hustu,

Zeruak gisontasun kentzen omen baitu.

Ez badugu lurrean ez otoitz, ez kantu:

Lan kezka, borroketan nundik ez abretu?

 

Gizonik gizonena zeruz betea zen:

Hari jarraikiz gare pittaka gizontzen.

Lur barnea zeruak du mamiz betetzen,

Azken egunean huts ager ez dadien.

 

Gizonik gizonena zeruz betea zen:

Hari begira baita gizona gizontzen.

 

                        * * *

 

Zerua ez da zerbeit, lurra den bezala:

Guk dakigu zerua goiko norbeit dela.

Ez dezakegu ikus goikoek bezala,

Bainan jada lur huntan gurekin dabila.

 

Gurekin dabila bai, piztuz mundu hitsa

Eta otoitz-giroaz betez gure hutsa.

Ez da-eta otoitza ezaxol-ametsa

Bainan goikorainoko arimaren hatsa.

 

Zerua ez da zerbeit, lurra den bezala:

Guk dakigu zerua goiko norbeit dela.

 

                        * * *

 

Ilargi bai izarrak bazauden dirdiran

Eta ni, harat beha, otoizle nindoan.

 

                        * * *

 

Ez da fraiden otoitza ezaxol-ametsa

Bainan goikorainoko munduaren hatsa.

 

13-9-70

 

aurrekoa hurrengoa