www.armiarma.eus
idazleak eta idazlanak Herri literatura TESTUAK Corpus arakatzailea Klasikoen Gordailuari buruz



Uhaineri nausi
Xabier Iratzeder
1958 -1971

      [liburua osorik RTF formatuan]
      [Literaturaren Zubitegia]

 

Iturria: Biziaren olerkia, Iratzeder. Gero, 1983

 

 

  hurrengoa

UHAINERI NAUSI

 

Fraide sartzean, Zeruletzean

        nere ustez nihortua,

Bota nituen uhain artean

        bai bihotza, bai burua.

 

Uhainez uhain eman naiz eman,

        Jainkoaren itsasoan.

 

Nintzen nihauri eginez uko

        nahitez naiz norbeit egin:

Orduan berritz bakeratzeko

        zer borrokak uhainekin...

 

              * * *

 

Nihorena zen otoitz-mintzairan

        salmo-kantuz igerikan,

Fede betean, bake osoan

        anaiekin nindabilan.

 

Uhainez uhain eman naiz eman

        Jainkoaren itsasoan.

 

Nihorena zen otoitz-mintzaira

        batzuena zaiku egin.

Bat egon gaiten eta bakera,

        zer borrokak uhainekin...

 

              * * *

 

Barnetik uhain, kanpotik uhain,

        orotarik zer uhainak!

Galernan barna baitut nere zain,

        hezten ditu nitan Jaunak.

 

Uhainez uhain eman naiz eman

        Jainkoaren itsasoan.

 

Kristoren baitan, norbeit egina

        salmo-kantuz igerikan,

Hara nun beti eman-emana

        uhaineri nausi noan.

 

13-6-71

 

  hurrengoa