www.armiarma.eus
idazleak eta idazlanak Herri literatura TESTUAK Corpus arakatzailea Klasikoen Gordailuari buruz



Jaunaren hegala
Xabier Iratzeder
1972 -1980

      [liburua osorik RTF formatuan]
      [Literaturaren Zubitegia]

 

Iturria: Biziaren olerkia, Iratzeder. Gero, 1983

 

 

aurrekoa hurrengoa

                        Karrika batean

                        norbeiten beha

 

 

IGURIKATZEA

 

                        «Et expecto...»

 

Igurikatzea

    gauza luzea,

bihotz-barnekoen

    xurga-leizea.

 

Igurikatzea

    gauza luzea...

 

Igurikan on da

    ezagutzea

zure baitan, Jauna,

    den oinazea.

 

Igurikatzea

    gauza luzea...

 

          * * *

 

Zenbatetan nauzun

    igurikatu,

galdetuz gau-egun:

    nun ote da nun?

 

Zenbatetan nauzun

    igurikatu...

 

Bihotza zoin ilun,

    deitzen ninduzun;

eta nik, tuntulun,

    ez zaitut entzun.

 

Zenbatetan nauzun

    igurikatu...

 

      * * *

 

Igurikatzea

    gauza luzea,

bihotz-barnekoen

    xurga-leizea.

 

Igurikatzea

    gauza luzea...

 

Gauaren ondotik

    hau argitzea!

Hil-ondoan huna

    hilen piztea!

 

Igurikatzea

    zeru-bidea.

 

Bordale-n, 22-5-77

 
aurrekoa hurrengoa