www.armiarma.eus
idazleak eta idazlanak Herri literatura TESTUAK Corpus arakatzailea Klasikoen Gordailuari buruz



Jesusen Bihotzaren Debozioa
Sebastian Mendiburu
1747, 1751

      [liburua osorik RTF formatuan]
      [inprimitzeko bertsioa PDFn]
      [Literaturaren Zubitegia]

 

Bertsio elektroniko honen egilea: Ales Bengoetxea.

Iturria: Jesusen Bihotzaren devocioa, Sebastian Mendiburu. Pedro Joseph Ezquerro, 1751

 

 

aurrekoa hurrengoa

IRAKURLEARI

 

        Euskarazko Libru hau Euskaldun utsentzat egiña da; bada Franzes, Latin edo Gastelania dakitenak, neke gutiagorekin ekus dezakee beste Libruetan, onetan erakusten dena. Españiako Euskaldunik geienak Jesusen Bihotzaren debozioa arturik arkitzen dira; baña debozio onek eskatzen dituen gauzen berri, beintzat andirik, ez dutela. Euskaldun Erri larrietan badira Bihotz maite onen Ballera santu edo Kongregazioak; baña Kongregazioko egunetako ez dute, behar lukeen, Euskarazko Librurik. Oberen bat ager dedin artean, alik ongiena moldatu dut Jesusen Bihotzaren deboziozko hau, izan dedin, nondik Kongreganteai Elizan irakurri (irakurriko dituzu onelako *** izarrekin arkitzen diran §§), ta debozio artu duten ta artuko dutenak egin behar dutena non ikasi.

        Librua ez da guzia nerea, ez eta besterena ere. Onegatik ezpaliz, hitz alferra lizake euskaraz, Libruaren asieran edo tituloan ezarri dudana. Egiten hari nintzanean, begietan iduki dut geienean, Jesusen Konpañiako Aita Juan Croisetek debozio beraren gañean egin zuena. Hark berean dakarzien bezala arkituko dituzu onetan esaten diran gauzen asierak edo buruak. Emen arkitzen diran gauzarik geienak an arkitzen dira; baña ez dira arkitzen bietan gisa batean. Ango gisara bagenekartzi ango gauzak, ezpagenekartzi bezala izain lirake, eskolarik ez duten anitz Euskaldunentzat. Neke andirik gabe nork nai adi ditzakean moduan epeñi ditut, nere ustez, han modu eder goratuan, gizon adituentzat egiñak bezala dauden gauzak.

        Orregatik lenago dauden haren zenbait gauza utzi ditut azken alderako; azken aldekoak ezarri ditut erdian, lenbizian edo obeki iduritu zaidan tokian. Eskriturako ta dakartzien Santuen hitzak alik zuzenena gure Euskarara ditut; baña ez beti hitzez hitz. Gañerako gauzetan ez dut begiratu, gauza adirazteko, dakartzien hitzetara; begiratu dut hitzekin esan nai duenara; ta erraten dut hau, len errana ezpalego bezala, ta euskaraz errateko, zuzenenak dirala iduritu zaizkidan hitzekin.

        Utzi ditut Serore edo Monja, Relijioso, Apaiz ta beste zenbaitentzat ederki dakartzien gauzak; horien uts egiteen berririk izan ez dezaten len etzutenak; eta behar gabe ez luzatzea gatik Librua; bada orietatik zenbait ez dira arkitzen bazter oietan, ta arkitzen diranak ez dute euskarazko Libruen beharrik, egin behar dutena jakiteko.

        Galdu dira, euskarazko Librurik gabez, euskarazko anitz hitz; eta gelditu diranak, ez dituzte Euskaldun guziak aditzen. Badira Gipuzkoan, Nafartar geienak, euskarazkoak izana gatik, aditzen ez dituzten hitzketak: baita Nafarroan ere, Gipuzentzat berriak diruditenak: eta Gipuzkoako ta Nafartarren bazter batzuetan aditzen dira, beste askotan aditzen ez diran zenbait hitz-egite. Non nai adi ditezkeanak billatu ditut, al egiñean, artzen ditudala orretarako, euskarazkoak utzirik, beste zenbait hitz.

        Bi ez besteak laburrak dira Aita Croisetek dakartzien meditazioak edo orazio gaiak. Jainkoak nai badu, emain zaizkitzu laster beste Libru batean, behar adiña ta behar bezain luzeak: erdi-moldatuak daude geienak. Gañerako guzia, emen arkituko dezu, lau burutara bildua. Lenbizikoan erakusten da zer ta zein ona den Jesusen Bihotzaren debozioa. Bigarrenean, zer den gure aldetik debozio onek eskatzen duena. Irugarrenean, nola egin behar diran Jesusen Bihotzaren debozioak eskatzen dituen gauzak: eta Laugarrenean, urtearen buruan egin behar dutena debozio hau artzen dutenak. Jesusek dizula, guzia ikasteko, eta ikasten dezuna egiteko, behar dezuna.

        Emen bertan arkituko dituzu Jesusen Bihotzaren Kongregazioko Reglak; eta Bihotz beraren, Aita S. Ignazioren ta S. Franzisko Xabierren Bederatzi-urrenak. Batera bildu ditut, len berez zebiltzan bi Libruak, gutiago kostatzen zaitzula, izan dezazun guzia; ta guziaz balio zaitezen zure Animaren onerako. Ori da nik lan labur onekin billatzen dudana. Jainkoak dizula maiz irakurtzeko lekua ta gogoa; ta, irakurtzen dezun aldi oro, zere animarako nik nai nukean on guzia ateratzeko grazia.

 

aurrekoa hurrengoa