www.armiarma.eus
idazleak eta idazlanak Herri literatura TESTUAK Corpus arakatzailea Klasikoen Gordailuari buruz



Olerkiak
Nikolas Ormaetxea, «Orixe»
1950-1954

      [liburua osorik RTF formatuan]
      [inprimitzeko bertsioa PDFn]
      [Literaturaren Zubitegia]

 

Iturria: Orixe. Idazlan guztiak II: Sorkuntzazkoak, Nikolas Ormaetxea Orixe (Paulo Iztuetaren edizioa). Etor, 1991

 

aurrekoa hurrengoa

EGUZKIA JEKITZEN, ETZITEN

 

Argi-xinta sumatuz, ogeari muzin,

jekitzen naiz goizero bi belaunak arin.

Atea zabaltzean zakurras nerekin,

arnas-uxtu, mii luze, iñon egon ezin.

 

Irten gera. Zakurra zoraturik dabil

oin-muturretan dantzan, gorputza txoratil,

isats-zut, bekain arro, begiak biribil,

belarriak erne, eta bi besoak zintzil.

 

Ba goaz muño gora Eguzkiaren zun,

goiz ontan apustua nork irabazten dun.

Gu leenago! Kirika noiz asiko zaigun,

iñaurkin legorrean jarri gera bigun.

 

Zakurrak, nik, ez dugu makarrik begian;

esnatu da muñoa biok sumatzean;

ostoak pirpir asi dira zugatzean

eguneroko gure zantzuak artzean.

 

Orobat Eguzkiak ez du gaur makarrik,

ortzi guzian ez da nabari zardairik,

itsas-mendien ertza ubelik, gorririk,

apain irtengo zaigu Andrea gelatik.

 

Ara leenen izpia, biotzaren pozgai;

gero, mako bat, gero, zerbait egonik zai,

biribil irteten da menditikan ustai.

Illun zeuden zokoek bereela dute jai.

 

Begiak mindu gabe luzaro begira

ustaiaren ertzetik ezker eskuin bira,

argi legun arekin sendatuko dira.

Bizkor jotzen astean, gu geure tegira.

 

Zakurra baratzean etzan da zabala,

nik ere lanerako naiago dut itzala.

Sorkari oro dauka beroak zapala.

Nik gaur egingo lana ez bedi makala!

 

Eguzkia ba doa ogera kuzkurra.

Nola sar ikustera nerekin zakurra.

Isats, mutur, belarriz billatzen du lurra.

Zernai erio-zantzuk bai bula bildurra!

 

Ni bakarrik naiz alai, ba dut itxaropen

biamonez Ekia tiñel sortuko den.

Urteak urte, baiña ba dut aski kemen.

Alare liketena neretzat gau azken.

 

Itsasoaren ertza gorri pinpiriña,

ara sartzen asi da Euzki Erregiña.

Egunero jantzi bat eun berriz egiña,

gaur askotan bezala ginga-margo ziña.

 

Agur! Zuk deramazu zerekin eguna.

Lurra gorputz antzera gelditzen illuna.

Argi beti gogoa, zurekin laguna.

Ez gau, egun dedilla ni jasoko nauna.

 

Geldi bedi nolanai gorputza; gogoa

maitasun gorri miñez jantzirik bijoa.

Odei beltzen makarra, obenen laiñoa,

leen suntsi bedi! Zuzen Zuregana noa!

 

aurrekoa hurrengoa