www.armiarma.eus
idazleak eta idazlanak Herri literatura TESTUAK Corpus arakatzailea Klasikoen Gordailuari buruz



Biozkadak
Luis Jauregi, «Jautarkol»
1929

      [liburua osorik RTF formatuan]
      [inprimitzeko bertsioa PDFn]
      [Literaturaren Zubitegia]

 

Iturria: Biozkadak, Jautarkol (faksimilea). Gipuzkoako Aurrezki Kutxa, 1975

 

aurrekoa hurrengoa

ARTZAI-NESKA

 

                        Argiaren 1927an sariketan saritutakoa

 

           I

Eguzkia badoa

mendi-tartera:

mendi goiak gorritzen

ta illuna, beera.

 

Dilin-dala artaldea

ibartik gora...

atzetikan artzaiak

eta artzañora...

 

Or datoz artzai-nausi

ta morroitxoa;

nagusia galdezka

mutillai doa:

 

«T'ez al dek beserri bat

bertan ikusi...?»

—«Ura bai baserria,

ziñez, nagusi.

 

Ibaiaren alboan

antxe be-beeran,

ura edaten dagon

ardian eran.

 

Ango baratz, sagardi,

baso ta lurrak...!

Ango bei eta idiak

t'eize-zakurrak...!

 

—«T'ez ote dek ikusi

antxe larrean

artzai-neska eder bat

ardi-tartean?

 

Auxe zeru artako

izar argia,

auxe neretzako dan

ezti-ontzia.

 

Laister nere erregiña

izango dana,

nere biotz barrengo

kutun laztana...»

 

Itzok entzunda ixilik

morroi zintzoa;

mara-mara dario

negar-malkoa.

 

Gero zotinka dio:

«Ene nausia...

itzali da ango zure

izar argia.

 

Neonek atzo bertan

ikusi nuan...

Artzai beltzez jantziak

bere inguruan.

 

Bera... zuriz jantzita

an, atarian...

Antxe illotzik, zerraldo

zuri-zurian...!

 

Aingeru-arpegia

eta irri-parrez...

Artzaiak inguruan

berriz, negarrez...»

 

           II

Baserrira ariñ-ariñ

doa nausia...

Nork itxi biotzean

daukan zauria?

 

Dilin-dala artaldea

ibartik gora...

atzetik illun morroi

eta artzañora...

 

Eguzkia sartu da

mendi-tartean;

Odei eta mendiak

odol-antzean...

 

aurrekoa hurrengoa