www.armiarma.eus
idazleak eta idazlanak Herri literatura TESTUAK Corpus arakatzailea Klasikoen Gordailuari buruz



Zeru-menditik
Xabier Iratzeder
1941-1946

      [liburua osorik RTF formatuan]
      [inprimitzeko bertsioa PDFn]
      [Literaturaren Zubitegia]

 

Iturria: Zeru-menditik (1941-1946), Iratzeder. Ezkila, 1959

 

 

aurrekoa hurrengoa

HELDU ZAIKUNARI

 

                        Ama Birjina bazterrez bazter

                        zabilan urte hartan

 

                Bidez-bide zabiltza,

                Bidez eta mendiz,

                Erregintsu eta xuri,

                Argi-hastea iduri.

                Bidez-bide zabiltza,

                Jainkorat itzul-araziz

                Jende osteen bihotza.

 

        Bazabiltza herriz herri

        Jende uhainen artean,

        Lohi, nigar-itsasoan:

                Eta guziak

Dohakabe guzien bihotz, begiak,

        Heldu zaizkitzu kantari;

        Kantari eta eskuak

        Zu alderat luzatuak;

                Ezautzen baitute

        Agurtzen eta maitez maite

Beren Arreba, arrebarik arrebena...

        Hek bezala iragan zarena

        Ihes-bidetan, odol-bidetan

                Nigarka, auhenka

                        Eta herrestan,

                Nigarka, hipaka.

        Bethlehemen ta Golgothan...

        Beren arrebarik arrebena

        Bide beltzetan, lohi beretan

                Osoki garbi iragana...

        Eta zu erregintsu ta xuri,

                Argi-hastea iduri,

        Bazabiltza iduzkituz

Jainkoz, garbiz eta zeruz,

        Iduzkituz guziak,

Dohakabe beltzenen bihotz, begiak.

 

                  * * *

 

                        Hara jada hara

                Euskal-muga gainetan

                Larre-bide zurpailetan

                Zure zorion-dirdira.

                        Hara: heldu zare

                Goiz-argien pare,

        Eta Sokorritik, Beloketik,

                        Olandoitik,

        Mendi zintzur orotarik,

 

                Agurka eta deika

Ari zaitzu lohiz, minez beterik,

        Agurka eta hil-oihuka

                Euskaldun-arima:

 

        Zato laster, zato, Ama!

Senda gaitzazu, unki ta zora.

                Diru-errabitik,

                Plazer-sukarretik

        Euskal-bihotzak atera.

 

        Zato laster, zato, Ama!

Zure soaz, ederraz, dirdiraz

                Oro itzul-araz,

                        Oro,

Jainko Jaunaren zorion bizira.

 

                        Zato, Ama!

                Bazinaki nola garen

                        Ergel eta zoro:

        Dantzan goazi eta soinuz,

        Sos egarriz ta urguiluz...

        Soinuz goazi eta sistuz

                Euskal-izaitearen

                        Eta fedearen

                Elhortz-bestetara!

 

                Zato herriz-herri,

Gainez eta mendiz, ororen pizgarri.

        Zoro gare, bainan bero:

        Entzun euskaldun kantuak

                        Ilunpetik,

                        Lohipetik.

        Entzun gure dei kartsuak

        Eta zure soen dirdiraz

                        Itzul-araz,

                        Itzul-araz oro

                        Jainkorat

                        Bizirat.

 

                        Zato, Ama,

        Itzultze handiaren Ama!

 

1-10-46

 

aurrekoa hurrengoa