www.armiarma.eus
idazleak eta idazlanak Herri literatura TESTUAK Corpus arakatzailea Klasikoen Gordailuari buruz



Uhaineri nausi
Xabier Iratzeder
1958 -1971

      [liburua osorik RTF formatuan]
      [Literaturaren Zubitegia]

 

Iturria: Biziaren olerkia, Iratzeder. Gero, 1983

 

 

aurrekoa hurrengoa

IZAN ETA...

 

Izan eta... ez izan: zer dantzan gabiltzan!

 

Elizan eta plazan zerbeit, norbeit izan:

Gutan ariz Jainkoak denak berri ditzan.

Gustu hartzerakoan, ez ager, ez izan:

Gu itzaliz munduak Jauna ikus dezan.

 

Izan eta... ez izan: zer dantzan gabiltzan!

 

Fandangolari sortu eta fraide izan:

Banabil Jainkoaren zerurako dantzan.

Goizetan jeiki eta arratsetan etzan

Banabil itzulika Hak nahien aintzan.

 

Izan eta... ez izan: zer dantzan gabiltzan!

 

                      * * *

 

Naizen hau naiz agertzen guzien onetan,

Nere biziak dezan bertzer bizi eman.

Nere bizia berritz traba dutenean,

Ixil ixila noa dantzan Zurekilan.

 

Izan eta... ez izan: zer dantzan gabiltzan!

 

Izan ez naizenean ari zaizkit trufan

Eta sumintzen zaizkit izan naizenean.

Zer nahi dezatela pentsa edo erran;

Zurekin noa, Jauna, zerurako dantzan.

 

Izan eta... ez izan: zer dantzan gabiltzan!

 

                      * * *

 

Egin extiki soinu, Jauna, nere baitan,

Dudan jakin noiz izan eta noiz ez izan.

Zure eskuan, Jauna, dut eskua eman

Eta banoa bozik Zuk nahien dantzan.

 

3-12-69

 

aurrekoa hurrengoa