www.armiarma.eus
idazleak eta idazlanak Herri literatura TESTUAK Corpus arakatzailea Klasikoen Gordailuari buruz



Uhaineri nausi
Xabier Iratzeder
1958 -1971

      [liburua osorik RTF formatuan]
      [Literaturaren Zubitegia]

 

Iturria: Biziaren olerkia, Iratzeder. Gero, 1983

 

 

aurrekoa hurrengoa

                        Arantzazuko Amari

                        Gipuzkoako gaztez.

 

 

ARANTZEZ BETEKO AMA-BIHOTZA...

 

Arantzez beteko Ama-bihotza,

Entzun Arantzazun euskal-otoitza.

 

Euskal-lurra eta euskal-eliza

Ilunbez ilunbe minez dabiltza;

Otoi! zeruan den Aitari mintza

Gure ganat dezan eskua luza.

 

                * * *

 

Gipuzkoan, Ama, nungo har beltzak

Ditu barnetik jo gazten bihotzak?

 

Mendiz heldu dira dena su eta ke

Aterbe, laguntza eta lan eske;

Bainan luzaz hemen ezin dagozke;

Beloken badela geiegi bake.

 

                * * *

 

Odolean barna dute borroka

Eta ezpaioetan zer politika...

 

Eliza-gizonak ez dabiltzala

Kristok erran eta nahi bezala;

Kristo baitan ere orai ez dela

Herria pizteko behar ahala.

 

                * * *

 

Gipuzkoar gaztek zergatik ote

Ez dute guziek orai sineste?

 

Karlisten gerlatik hemen egonak

Fraide zitzaizkigun sartu geienak.

Hegoi-t-hamaseian zer fededunak!

Oraikoak aldiz har beltzak janak.

 

                * * *

 

Euskal-bihotz gazten gaitz horren beltzak

Amari zorrozki sartzen arantzak...

 

Gure lurrak aurten lorerik ez du:

Herra ta laparrak zaizko nausitu.

Amaren bihotza ezin sendatu,

Semetan galduak balin baditu.

 

                * * *

 

Arantzazuraino gainez gain jeiki;

Herri orotarik igan kartsuki.

 

Gerlaren odolak, galernaren beltzak

Gipuzko lurrean sortu arantzak

Loratuko ditu aurtengo pozak,

Euskal-suz beteko ama-bihotzak.

 

                * * *

 

Beha-zak, Andoni; entzun, Iñaki:

Gipuzko guzia kantuz ibilki.

 

Gaur berrogoi eta hamar urte du

Gipuzkoa dela Aloñan bildu;

Ama zerukoa betikotz baitu

Zaindaritzat eta amatzat hartu.

 

 

                * * *

 

Soinu, txistu, kantu! Bestarat jeiki:

Herri orotarik igan kartsuki.

 

Guziek Amari gainez gain ekar

Euskaldun sineste, bihotz eta kar:

Gazten berpizgarri dadin iratzar

Bihotz-ilunbetan goizeko izar.

 

                * * *

 

Beha-zak, Andoni; entzun, Iñaki:

Arantzazun txistu eta iduzki.

 

Mendiz etorririk orai bortz aste,

Beloke xuritzen ari zarezte;

Eta xuritzeak —nundik ez ote?—

Sortuko dautzue berritz sineste.

 

                * * *

 

Zuen bien amak hori balaki

Bertzekin loake, kantuz kartsuki.

 

Gipuzkoar amak, mendirat jeiki

Amen Amarekin kantatuz minki.

Jaunaren Bihotza denek bat unki,

Pitz dezan semetan sinets-iduzki.

 

15-3-68

 

aurrekoa hurrengoa