www.armiarma.eus
idazleak eta idazlanak Herri literatura TESTUAK Corpus arakatzailea Klasikoen Gordailuari buruz



Uhaineri nausi
Xabier Iratzeder
1958 -1971

      [liburua osorik RTF formatuan]
      [Literaturaren Zubitegia]

 

Iturria: Biziaren olerkia, Iratzeder. Gero, 1983

 

 

aurrekoa hurrengoa

NOLA ZAREN AMATXITU!...

 

        Nola zaren ama

                nola zaren amatxitu!...

 

Zure begi urdinak oraino baditu

Amodio xirripak eta xori-kantu;

Bainan nola zaizkitzun matelak ximeldu...

 

                nola zaren amatxitu!...

 

Ezpain ximurretarik badarizu beti

Bakea, zuhurtzia eta solas ezti;

Bainan, aditzen duzu nekez eta guti.

 

        Nola zaren ama

                nola zaren amatxitu!...

 

Lehen lehen zoin zinen arin ta pinpirin,

Gizongaia pilotan mirestearekin!

Orai, herrestan baizik, deusik ezin egin.

 

                nola zaren amatxitu!...

 

Soinekoa zinuen iguzki-kolore:

Ez omen zen Arbonan lorerik hain lore;

Bainan, ametsen pare, urteak joan dire...

 

        Nola zaren ama

                nola zaren amatxitu!...

 

Ez, amatxi, ez egon behakoa lano:

Haurren haurren begiak ikus hor zuri so.

Egon, irriz gazteri, gaztetuz oraino.

 

26-11-63

 

                        AIREA: Ezkila X.D.1

 

aurrekoa hurrengoa