www.armiarma.eus
idazleak eta idazlanak Herri literatura TESTUAK Corpus arakatzailea Klasikoen Gordailuari buruz



Pindar eta lano
Xabier Iratzeder
1920-1941

      [liburua osorik RTF formatuan]
      [inprimitzeko bertsioa PDFn]
      [Literaturaren Zubitegia]

 

Iturria: Biziaren olerkia, Iratzeder. Gero, 1983

 

 

aurrekoa hurrengoa

ARBASOEN DEIA

 

        Oihana intzirika

        Entzun dut mendian...

Auhena airatu da errekaz erreka,

Ikaraturik joan da ihesi pottoka,

Neronek egin nuen harperat lasterka.

        Oihana intzirika

        Entzun dut mendian...

 

        Urratu daut bihotza

        Oihu samin horrek.

Haitzen erroek edan odolaren botza

Jin zaut harpe hartarat. Oi zer gau beltz latza!

Aitek ikasi dautet beren zorigaitza.

        Urratu daut bihotza

        Oihu samin horrak...

 

        Aitek zeru lurreri

        Zioten nigarrez...

«Zertako ixuri dugu bada, odola ixuri?

Euskaldunak zatitan direlakotz jarri,

Herria ez zaiote orai maitagarri.»

        Aitek zeru lurreri

        Zioten nigarrez...

 

        Otoi, urrun zakizkit

        Intzire sarkorra!

Aiten arimak, nundik jinik ez dakit,

Zirimola batean hor iragan zaizkit...

Ilunbetan bihotza urtzerat doakit.

        Otoi, urrun zakizkit

        Intzire sarkorra!

 

        Etsitzen nuelarik

        Harpean nigarrez,

Bet-betan agertu zait behere hartarik

Argi xuri zirrinta, urrez gorriturik...

Laster haizatu baitu gaua haitzetarik,

        Etsitzen nuelarik

        Harpean nigarrez.

 

        Gure Euskal-Herria

        Ez zaiku, ez, hilen.

Argiak jabaldurik oihan beltz guzia,

Xutik oihu egin dut, atzarriz mendia:

Euskadik izanen du bere iduzkia!

        Gure Euskal-Herria

        Ez zaiku, ez, hilen!

 

Uztaritzen, ...-3-38

 

aurrekoa hurrengoa