www.armiarma.eus
idazleak eta idazlanak Herri literatura TESTUAK Corpus arakatzailea Klasikoen Gordailuari buruz



Lapurren menpean
Polikarpo Iraizozkoa
1935

      [liburua osorik RTF formatuan]
      [inprimitzeko bertsioa PDFn]
      [Literaturaren Zubitegia]

 

Bertsio elektroniko honen egilea: Ainhoa Beola

Iturria: Zeruko Argia, 1935-07 (199. zbka.) / 1936-07 (211. zbka.)

 

aurrekoa hurrengoa

53. Lapurren botikariarekin izketan

 

        Lapur-tegian zeuden zaurituak botikari protestante batek zaintzen zituen; Hupeh probintziakoa zan, gizon gazte, alai, adeitsu, atsegiña. Ameriketan artzai (edo apaiz) protestante baten eskolan ibilia zan; geografia ezagutzen zuen poliki eta misio katolikoen berri zerbait ere bazekien. Ederki idazten zuen latiñezko izkiekin eta Europako izkuntzaz poliki samar mintzatzen zan.

        Nere ezbearraz atsekabea erakutsi zidan eta Biblia bat eskatu zidan. Nik orduan nerekin Biblia bat ere ez nuela erantzun nion; biaña geroago emango niola bat ederra, berak ordu arte irakurri zituenak baiño osoagoa ta argibidez ornitua. Europako izkuntzaz mintzatzen giñan, eta txinoeraz esango etzizkidan ixileko zenbait gauza kontatu zizkidan.

        Lapur-tegian zeuden soldadu gorri aiek, lenago soldadu zuriak, Txiang kai xek-en Gobernuaren aldekoak izan omen ziran; baiña geroago, bear bezela gobernatzen etzula eta aberatsen ta beartsuen artean zuzen-kontrako ezberdintasun andia zegoela ikusirik, soldadu gorri edo komunista egin omen ziran. Aien eginkizuna, aberatsak ondatu ta beartsuai lasai samar bizitzeko bear dutena ematea omen da. Oraingo Txinako agintariak azpiratu ta oien ordez baserritar ta soldadu-batzarreak, txinatar jator ta komunistak jarri bear omen dira agintari. Bera botikari zedukaten gorri aiek garailari ateratzen omen ziran alde guzietan eta ordu arte iritxitako garaipeank aipatu zizkidan. Wang tai txi zan beren agintari nausia.

 

aurrekoa hurrengoa