ALOÑA MENDI

Aloña mendi aldamenean,

guztiz leku agirian,

Oñati eder au ikusten da

zelaitxo baten erdian.

San Migeletan ango jaietan,

dantzan ta alaitasunian,

ai zer egunak pasa ditugun

bizkaitarren lagundian.

Bergara ta Markina,

Mondragoi ta Oñati,

gaztedi eder fina

an bai zan galanki.

Partidu ederrak jokatzen ziran

egun aietan Oñatin;

jokalari onak nola ziraten,

onena zein zan nork jakin?

Batzuek zioten: Or Bizimodu,

besteak «Biba» Gereta;

mutil gogor au azkar zebilen

arrapatzeko pelota.

Merlaet ta Marinela,

Zugarri, Gereta,

aurrean dabilena

arrimatzen pareta.

Marinela da altu zabal bat,

guztiz jokalari ona,

Bizimodu da aidosua ta

atzean ematen du lana.

Merlaet, berriz, galai gazte bat

segurua ta arina;

Zugarri aurrean, ene mutilak,

ematen du zer egina.

Bizkaian ta Probintzian,

pelotari onak,

oberik ez Españan.

«Gora euskaldunak».

Goierriko jende guztia,

lekaioka ta saltoka,

umore onean mendiak bera

Oñatira doa lasterka.

Ai! zer egunak, nere lagunak,

Probintzin dira pasatzen;

oraindik ere oroitutzean

bereala naiz poztutzen.

Nere adiskide maiteak,

diberti geranak,

naiago nuke balitz

San Miguel egunak.

Gora Oñati eder ta zabal

ta bere jende atsegina,

kanpotar danok ongi artzeko

egin dezute alegina.

Erri onetan alkatea ere

da leiala ta txit ona,

danok batean esan dezagun:

gora gure alkate jauna.

Agur, gaztedi ederra,

erri au det maitatzen,

emendik banoa baina

biotza det gelditzen.

Mila amorio dedan erritik

penaturikan joan bear

nere biotzak egingo luke

bai orain bertatik negar.

Txikia ta aundi, danori, agur,

bai ere armenteriak,

adiskideak Kristoren legez

danok gerade anaiak.

Nere adiskide maiteak,

oiek dira egunak,

aberats ta pobreak

gaur gera lagunak.

Plaza eder artan ibiliagatik

dantzan, bai, jende guztia,

umore ona zan danen artean,

erri guztia pakean.

Neskatxa ederrak agertzen ziran

su argien artetian;

ondoren berriz, galai gazteak

txoraturikan atzian.

Danbolin soinu eder

dantzan gazte zarrak,

zebiltzen umore onez,

poz goierritarrak.

Erriko jaunak atzera zuan

ilunabarrean dantza;

ai! ederra eta ikusgarria

orduan Oñatiko plaza.

Ezin da obeto egin zituan

jira-bira dantzaurriak;

ondoren zetozen apaindurik

bertako dama guztiak.

Dama artean dana

modu ta grazia,

arriturik gelditu

zan jende guztia.