www.armiarma.eus
idazleak eta idazlanak Herri literatura TESTUAK Corpus arakatzailea Klasikoen Gordailuari buruz



Lur berri billa
Nemesio Etxaniz
1967

      [liburua osorik RTF formatuan]
      [Literaturaren Zubitegia]

 

Iturria: Lur berri billa, Nemesio Etxaniz. Izarra, 1967.

 

 

aurrekoa hurrengoa

DEBARI ABESTIA

 

                Erbestetutako debarrak bere erriari.

 

Debako erri maite,

nere sor-lekua,

urruti nabilkizu

zugatik mindua.

Etzait beñere aztu

zure ingurua,

biotzean bai zaitut

barrura sartua.

 

Itxasoak ertzean

egin zizun leku:

amak aurra bezela,

or laztantzen zaitu:

zu lotaratzeko du

olatuen katu:

urak txirla ain politik

eztu iñoiz baztartu.

 

Mendi oñean zauden

seaska txuria,

arrizko mirari da

zure eliz-nausia.

Ondartza gorriaren

atze zumardia:

kabi bat dirudizu

zerutik jausia.

 

Alostorreko belak,

Maspeko mollarri,

Zubeltzutorren il zan

andre gorulari;

Buztiñaga ta Iturtza,

burrukan alkarri:

antziñatik ditugu

Deban oroigarri.

 

Zure alboan dezu

Santa Kataliña,

debarrak San Juanez

dantzatzeko gaña:

itxasoari munka

Andutzek dun oña,

zerurako armalla

dan muño liraña.

 

Artzabaldik aurrera

baratza zabala,

emaitz guzietatik

ugari damala,

Jaunaren mirari bat

esan leike, dala:

Paradisua ortxe,

itxura da, zala.

 

Sasiolatik dator

ibai aberatsa,

illargi berrietan

angula arratsa,

ujola-egunetan

egurra ta zotza,

apakiñez berotu

dedin etxe otza.

 

Andutz ta Arno dituzu

zure zeletari,

gallurretan dutela

Gurutzea agiri:

arri biurtutako

otoitz bi iduri,

zerua nun dagoan

erakusten guri.

 

Jaso ezazu, Deba,

goi zure begia,

menditik datorkizu

zeruko Argia,

mariñel larrituen

Izar pozgarria:

zurea da ITZIARKO

AMATXO maitia.

 

Etzazu negar egin,

ezkutuan, maite;

burua zuri baña

biotza det gazte.

Debara noa berriz

zure biotz-eske,

Itziarko Amatxok

bedeinka gaitzazke.

 

aurrekoa hurrengoa