Besterentzat errez

Don Lorentzok birritan atzo limosnea

Agindu eustan eta gaur jorik atea,

Lagun zer deritxazu ak egin deustala?

Neskatxea agindu eskalleretara,

Ta arek laster bota nau Jaungoikoa lagun

Esanda berba orreik otz, motz eta illlun.

—Esaidazu garbiro Juan, bene benetan,

Laguntzen deustazuna iñoz premiñetan

Orri esaten jako berbea jatea?

—Bai, baña obeto da esan edatea,

Ez dalako mamin da azurdun gauzea;

Alanbere naiz dala bata zeiñ bestea,

Ez dau Jose merezi damurik artzea;

Baldin agintzen bada gauza bat birritan

Beiñ emotea aiña on oi da izan.

—Baña orrelan dala ziurra da ori?

—Askok diñoenean Txomin, badirudi.

—Orduan pesetarik ez eskatu niri

Pagauko deutsudala esan deutsut zuri

Ez birritan bakarrik baita geiagotan

Onezkero zagotaz zeu niri zorretan.

Kontsejua emoten barrez arpegia

Juanek eukan ta artzen illun bekokia:

Askotan izaten da emoten erreza

Norberentzat danean irunsten nekeza.